අතීත උරුමයක් ඇති පිදුරංගල

පසුගිය සතියේ අප මෙම චාරිකා සටහන නිමාකළේ ඓතිහාසික පිදුරංගල පුදබිමට පැමිණීමෙනි. සියවසකට එහා ගිය අතීත උරුමයක් ඇති පිදුරංගල විහාරය යුග කිහිපයකට අයත් පින් බිමකි.

වර්තමාන ස්වාමීන් වහන්සේලා වැඩසිටින ආවසගෙය පසුකර ඉදිරියට යනවිට වම් පසින් වත්මන් බෝධීන් වහන්සේ දැක වැඳපුදා ගත හැකි අතර ඒ අසලින් විහාරයට පිවිසෙන පියගැට පෙළ හමුවෙයි. එම පියගැට නැගීමෙන් පසු ස්වාභාවික ගල් ලෙනක් තුළ පිහිටා ඇති පිළිම ගෙය හමුවෙයි.

කටාරම් කෙටූ ගල් ගුහාව තුළ අවුකණ ප්‍රතිමාවේ අනුරුවට ඉදිකළ ශෛලමය හිටි පිළිම දෙකක් දැකිය හැකිය. පසු කාලීනව මෙම ප්‍රතිමාවල තීන්ත ආලේප කර ඇති බැවින් බැලූ බැල්මට ඒවා ශෛලමය ප්‍රතිමා ලෙස හඳුනාගත නොහැකිය.

එසේම පසු කාලීනව තනා ඇති සැතපෙන ප්‍රතිමාවකින් සහ හිඳි පිළිම දෙකක්ද වන්දනා කර ගත හැකිය. මෙහි ඇතුළත බිත්ති සහ පිටත බිත්ති වල බුදු සසුනේ විවිධ සිදුවීම් චිත්‍රයට නගා තිබේ.

ස්වාභාවික ගල් ලෙනක් තුළ ඉදිකර ඇති මෙම පිළිම ගෙයි ඉහළ ගල් පියස්සෙහි අලංකාර නෙළුම් මල් රටාවක් දැකිය හැකිය. එසේම මෙම ගල් ලෙනෙහි වම්පස විෂ්ණු දෙවියන් වෙනුවෙන් ඉදිකළ දේවාලය පිහිටා තිබේ.

පිදුරංගල පර්වතය මුදුනට පිවිසීමට මෙම විහාරයේ දකුණු පසින් ඇති පාරෙන් ගමන් කළ යුතුය. විශාල ගල් අතරින් තනා ඇති මෙම මාර්ගය ගල් පඩි යොදා සකස් කර ඇති අතර ස්වාභාවික තුරු වියන ඉහළ සිට සෙවණ සලසන නිසා පරිසරය ගුප්ත අඳුරු ස්වාභාවයකික් යුතුය. විවිධ වූ ශාඛ අතර නාගස් බහුලය. මේ මල් පිපෙන කාලය බැවින් නාමල් පෙති විසිරී ගල් මත රැඳී තබෙනු දැකිය හැකිය. එසේම නාමල් සුවඳ මුසුවුණු සිසිල් වායුවෙන් ළය පුරවා ගැනීම ගල් පඩි නැගීමෙන් වෙහෙසෙන ගතට ඔසුවක් සේය.බැලු බැලූ අත දැකිය හැකි නිල්වන් තුරු වියන අතරින් විරාජමානව නැගී සිටින සීගිරි පර්වතය අතීතයේ කෙසේ අලංකාරව තිබෙන්නට ඇතිද? කාශ්‍යප රජු අද අප සිටින මෙම ගල් පර්වතයේ සිට සිය වාසය සඳහා තෝරාගත් සීගිරියේ අලංකාරය දැක මොනතරම් නම් ආඩම්බරයකට පත් වන්නට ඇතිද? සැබැවින්ම මෙය ලෝක උරුමයක් ලෙස නම් කිරීම පිළිබඳව අප ආඩම්බර විය යුතුය. එසේම මෙවැනි සුන්දර, දුර්ලභ ස්ථාන වලින් පිරී ඇති පින් බිමක් වන මේ ලක් පොළොවේ උපදින්නට තරම් අප කොයිතරම් පින්කර තිබෙන්නට ඇතිද? ගත රැඳි වෙහෙස උදුරා ගනිමින් හමා යන දැඩි සුළඟේ සිසලස විඳිමින් සීගිරි පර්වතය වෙනස්ම කෝණයකින් පෙනෙන ඒ දසුනින් නෙත් ඉවතට ගන්නට මගේ සිත ඉඩ නොදේ.

ඔබ මෙතැනට පැමිණිය හොත් මෙතැනින් ඉවතට යන්නට නම් උත්සාහ නොකරනු ඇත. මට දැනෙන ඒ හැඟීම ඔබටත් එලෙසම දැනෙන බව මට සහතික නිසාය. ඔබ මේ ගමන එනවිට අනිවාර්යයෙන්ම වතුර බෝතලයක් රැගෙන ආ යුතුය. ඒ පර්වතය තරනය කිරීමේදී පිපාසය දැඩිව දැනෙන බැවිනි. එහෙත් එලෙස රැගෙන එන ජල බෝතල ආපසු රැගෙන යන්නට අනිවාර්යයෙන්ම මතක තබා ගත යුතුය.එසේ නොවුව හොත් ඔබ මේ පරිසරයට ආදරය නොකරන විනාශ කාරී පුද්ගලයකු බවට පත්වන හෙයිනි.

මෙම ගල් තලාවේ සිට හාත්පස නෙත් යොමු කරන විට පෙනෙන දසුන අලංකාරය. නෙත් පෙනෙන මානයේ ඇත්තේ එකම හරිත පැහැයකි. තැනින් තැන කුඩා වැව් රාශියකි. සීගිරිය ලෝක උරුමයක් නිසා සංචාරක ආකර්ශනය වැඩිය. මේ නිසා තැනින් තැන ඉදිකර ඇති හෝටල් ඉතා අලංකාර ලෙස පෙනේ. මෙම ගල් තලාව මඳක් ආනතියකින් යුක්තව විශාල ලෙස පැතිර තිබේ. අතීතයේ රාවණා රජු සිය දඬුමොනර යන්ත්‍රයෙන් ගමන් බිමන් යන්නට මෙම ගල්තලාව භාවිතයට ගත්තා යැයි ජනප්‍රවාදයේ දැක්වෙන්නේ මේ සුවිශේෂි පිහිටීම නිසා විය හැකිය. උදෑසන හිරු නැග එද්දි මෙන්ම සවසට හිරු බැස යද්දී අවට මොනතරම් සුන්දර දසුනක් මැවෙනු ඇත්ද? ඒ දසුන දකින්නට මෙහි ඉන්නට කාලය හරස්වී ඇත.

සීගිරිය සහ මෙම පිදුරංගල ආශ්‍රිතව ඇති බොහෝ තොරතුරු කාශ්‍යප රජතුමාට වඩා රාවණා රජතුමා වටා ගොඩ නැගිලා තිබෙන බව තමයි වර්තමානයේ වඩාත් කතාබහට ලක් වෙමින් තිබෙන්නේ. විශේෂයෙන් ලංකාවේ අතීතයේ තිබුණු දියුණු තාක්ෂණය රාවණා මත තමයි ගොඩ නැගිලා තිබෙන්නේ. ඒ කාලයේ ජීවත්වෙලා ඉඳලා තිබෙන්නේ යක්ෂ ගෝත්‍රිකයන්. ඒ සියලුම දේවල් විනාශ කරලා නැති කරලා දැම්මා කියලා තමයි බොහෝ දෙනෙක් විශ්වාස කරන්නේ. එයින් එක් දෙයක් තමයි අංගම්පොර සටන් කලාව. ඒ නිසා අතීතයේ අපි ප්‍රබල ජාතියක්ව සිටි බවට සාධක ඇති මේ පිදුරංගල ඓතිහාසිකව ඉතා වටිනා පූජනීය ස්ථානයක්. එය රැක ගැනීම ආරක්ෂා කර ගැනීම අපේ වගකීමක්.‘‘

අපේ ප්‍රෞඩ ඉතිහාසයේ අතීත හෙළ විරුවන්ගේ ජීවන හුස්ම රැඳුණු, මහා රහතන් වහන්සේලාගේ පාද ස්පර්ශයෙන් පවිත්‍රවුණු පිදුරංගල පුද බිමේ ගත කළ හෝරා කිහිපය සදා මතකයේ රඳවා ගනිමින් අප එම පින් බිමෙන් එන්නට පිටත්වීමු.