කොළඹ අවටින් රසට කොත්තු කන්න මේ තැන් ට්‍රයි කරලා බලන්න.

කොත්තු කියන්නෙ  ‍ෙකල්ලො කොල්ලො ආසම කෑමක්. බඩ පිරෙන්න කන්න වගේම බයිට් එකට කන්නත් පුළුවන් නිසා ඒ ආසාව එන්න එන්නම වැඩි වෙනවා. ඒ ව‌ගේම රොටි කොත්තු, ඉඳිආප්ප කොත්තු වගේම චීස් කොත්තු එක එක මසින් එකේක රසින් තියෙන නිසා සතියක් එක දිගට කෑවත් විවිධත්වයක් ඇතිව කන්න පුළුවන් වග අපි කවුරුත් දන්නවා. ඒ වුනත් සමහර තැන්වල කොත්තු අපිරිසිදු නිසා සමහරු පොඩ්ඩක් අවුලෙන් තමයි කොත්තුව කන්නෙ. අපි කියන්න යන්නෙ කොළඹ අවටින් රසට කොත්තු කන්න පුළුවන් තැන් ටිකක්. රස වගේම මහ විශාල අවන්හල්වල තියෙන අධික මිලත් නැති නිසා පිරිසිදුවට හිත පිරෙන්න පොකට් එකටත් වාසියට කොත්තු කන්න මේ තැන් ට්‍රයි කරලා බලන්න.

පැය විසිහතරම ඕපන් කරලා තියෙන ​මේ කඩේ තියෙන්නෙ ගාලු පාරෙ ඩර්ඩන්ස් රෝහල කිට්ටුවෙන්. කඩේ ළඟින් යද්දිම එයි සුවඳ. රෑට නම් කඩෙන් එලියෙත් මිනිස්සු වාඩි වෙලා කොත්තු කනවා දකින්න පුළුවන්. චීස් කොත්තු, පාලන්දි කොත්තු, මසාල කොත්තු, සැර වැඩියෙන්, සැර අඩුවෙන් එකේක රසින්. නියමෙට ටෙන්ඩර් වෙන්න හැදිච්ච රස මස් කෑලි කොත්තුවත් එක්ක නැතුව වෙනම කන්න පුළුවන් තරමට මැරිනේට් වෙලා. කොත්තුවත් එක්කම යන්න කෝක් එකක් ගත්තනං දිවට කොත්තුවෙ රස දෙගුණ වෙනවා දැනේවි. රස, පිරිසිදුකම, ලාභය, සර්විස් එක කියන හැම දේ ගැනම හිතද්දි ප්ලාසා තමයි කොළඹ තියෙන හොඳම කොත්තු කඩේ. ඩ්‍රින්ක් එකක් දාන්න හිතාගෙන අරන් යනවනං එයාල​ට කියලම කොත්තුව දැවිල්ලට දාගන්න.

රට හැම තැනම පිලාවුස් කඩ වැහිවැහැලා. නිවු/ග්‍රෑන්ඩ්/සුප්‍රීම් වගේ ප්‍රිෆික්ස් දාගෙන වැහිවැහැලා තියෙන පිලාවුස් කඩ අස්සෙන් අපි කියන පිලාවුස් එක හොයාගෙන යන එක ලේසියි. තියෙන්නෙ බම්බලපිටියෙ පොලිසිය ඉස්සරහා. මෙතනත් පැය විසිහතරම ඕපන්. එතන තියෙන චීස් මසාල කොත්තුවත් හරියට ටිපිටිප් වගේ වහවැටෙන කෑමක්. මතක ඇතුව චීස් මසාලා කොත්තුවෙ ඉඳිආප්ප වර්ෂන් එක ගන්න එපා. ක්‍රීම් එකක් තමයි කන්න වෙන්නෙ. රොටි කොත්තුව කෑවොත් ඔයාලා පාර්සල් කරගෙනත් කොත්තුවක් ගෙදර ගෙනියනවා ෂුවර්. ඒ වගේමයි සාමාන්‍ය රොටි කොත්තුවට දාන රොටියත්, සිහින්වට කපපු ඝනකම නැති රොටි කෑලි නිසා කොත්තුව ස්ලං ගාලා බඩේ. කටෙන් කටට මසාලා රස දිය කරලා බඩට යවන ගමන්ම දිව රීෆ්‍රෙෂ් කරගන්න කෝක් එකකුත් ළං කරගන්න.

තර්ස්ටන් එක ඉස්සරහ තියෙන රහීමා එක ප්‍රසිද්ධ ඒකෙ බිරියානි එකට. බිරියානි එක නැතත් එතන දෙන කොත්තුව කාපු මිනිහෙක් ආයෙ හැරෙනව බොරු. තෙල් බේරෙන තෙත කොත්තුවක්. රස වෑහෙනව. සුවඳත් නියමෙටම. කන්න කන්න ආසා හිතෙන අළු පාට පිඟානෙ නිල් පාට ටෙක්ස්චර් එකක් තියෙන රහීමා පිඟාන මතක් කරද්දිත් කටට කෙල උනනවා. හැබැයි වැරදිලාවත් රහීමා එකෙන් චීස් ‌කොත්තු කන්නෙපා. චීස් කෑලි දෙකක් විතරක් දාලා ගහපු පාණ්ඩු පාට කොත්තුවක් මේසෙට ඒවි. අපිට දීපු කොත්තුවෙ චීස් කෑලි දෙකක් දාලා ගහලා තව චීස් කෑලි දෙකක් උඩින් තියලා ගෙනත් දුන්නෙ හැන්දෙන් කොත්තු කකා අතින් චීස් කන්න වගේ. හැබැයි එහෙමයි කියලා රහීමා එකේ නෝමල් රොටි කොත්තුව කිසිම විදියකට අවතක්සේරු කරන්නෙපා. උකුවට තියෙන ග්‍රේවි එකත් වැටුනම ඉන්න පුළුවන් වෙනමම දිව්‍ය ලෝකෙක. ප්ලේස් එක රෑ 10.30ට වහනවා.

කට්ටිය මේක දන්නෙ ලේක් විවු නමින්. ඉස්සර තිබ්බෙ ගංගාරාමෙ කිට්ටුව. දැන් තියෙන්නෙ ශාන්ත බිෂොප් කන්‍යාරාමෙ ප්‍රධාන ගේට්ටුව පහු කරලා දකුණට හැරුනම. හොයාගන්න ලේසියි. කෑම ජාති ගොඩයි. රයිස් ඇන්ඩ් කරි, ෆ්‍රයිඩ් රයිස්, කොත්තු, නූඩ්ල්ස්, ඉඳිආප්ප, පිට්ටු වගේ කෑම රෑට පිරිලා. ඒ හැම එකම රසයි. කොත්තුව සුවිශේෂයි. රහීමා කොත්තුව වගේම නියම තෙතට තියෙන, ලොකු පෝෂන් එකක් හම්බෙන, හොඳට කට දන කොත්තුවක්. චීස් කොත්තුව තමයි නියම. ඒකෙ තරං අමුතු රසක් ලොවෙත් නෑ. චීස් එක්ක කවලං වෙච්ච රෝස්ට් චිකන් කෑලි හැපෙද්දි නියම රසක් එනවා. රැවුල්කාර අයිතිකාර මහත්තය ඉන්න වෙලාවට ඇරෙන්න සර්විස් එක ගැනනං වැඩි ලකුණක් දෙන්න අමාරුයි. ඒ වගේම මෙයාලා ගාව ගොඩක් තැන්වල නැති පෝක් කොත්තුත් තියෙන එක මේ තැන ඉහළින්ම තියන්න හොඳ පොයින්ට් එකක්. මෙතන රෑ 11.30 වෙනකං ඕපන්.

තෝසෙ වලට අති ජනප්‍රිය රහුමානියා එකට අල්ලපු වැටේ තියෙන මේ කඩේ බිරියානි සහ කොත්තු කියන දෙකටම වගේම අන්තිමට කන්න පුළුවන් වටලප්පමටත් ප්‍රසිද්ධයි. ඒ කොහොම වුනත් කටට රසට කන්න පුළුවන් කොත්තුවක් විදියටත්, සර්විස් එක නියමෙට ලැබෙන නිසාත්, කොත්තුවෙ මස් හම්බෙච්ච මිනිහට සතුටට පපුවෙ අමාරු හැදෙන තත්ත්වයක් නැතුව කටෙන් කටට මස හැපෙන නිසාත් සුල්තාන්ස් පැලස් කියන්නෙ කොළඹ කොත්තු කන්න නියම කඩයක්. කඩේ රෑ දොළහෙන් පස්සෙ වහනවා. ඒ වගේම වෙජිටේරියන් යාළුවෙක් ඉන්නවනං රහුමානියා එකට එයාව යවලා වීදුරු කෑල්ලෙන් මූණට මූණ බලාගෙන කන්නත් පුළුවන්. අන්න ඔප්ෂන්ස්!